Sunday, February 1, 2015

Hikayat Khutbah Wada

Foto Ilustrasi Google Image
Oleh : Asysyairazi Abdul Wahid, Lc  

Assalamu'alaikum wa rahmatullah
Aroe dua blah lôn grak phôn sapa
Saleum ulôn bri kéu mula kalam
Lôn buka nazam hikayat lôn rika

Seulawéút saléum keu Khairul anam
Junjungan alam makhluk semua
Keu Al Sahabat mandum sekalian
Keu Waréh nabi peutunyök hamba

Dengen Bismillah lôn mula nazam
Pujöe keu Tuhan atéuh karonya
Lôn cûba rika  khutbah janjongan
Bak haji wada' Rasul bríé sabda

Neudengè bèugèt kalam dari lôn
Lôn néuk pêu sampöe kalam Rabbana
Mungken thôn ukeun ka hana lei lôn
Nibak mauqif nyöe nyâng lagei nyöe rupa

Kalam nyang kéu phôn wahé umat islam
Bek peuröe darah urëung tân dausa
Meu bék gata cuè hareuta insan
Bandum nyang harèum tinggai beu sigra

Teuma kéu dua peujiöh nyang riba
Nyan buét ilanyä waresan jahili
Ta peukarat gôb syetan peudaya
Ta mita harta kén nyang meubudi

Nyang kêu lhéi teuma peutimang keúadilan
Nyankeuh hai insan téudèng Agama
Buét  meuröe darah peugadéh rijang
Adat jahiliah ta gantöe sigra

Teuma yang keu peút syiar teu peutrang
Ajaran tauhid kén sembah berhala
Wasani ta tinggai bék meu gisa ulang
Haq beumumat beukéung batèil ta bungka

Hak kewajiban keu limeng khutbah
Seusama muslimin ngen man seulingka
Laköe ngen binöe peukeng amanah
Yang Allah peugah nyan ta kèurija

Wahei mukminin ta peukéung ikhwah
Gata syedara lagei saboeh ma
Meu bek ta reubot yang ken hak gata
Selaen ngen cara syariat Agama

Meu bék tagisa kéu seumah berhala
Meu bék ta meu prang sare syedara
Beu gét ta mumat ngén punca islam
Hadits ngen qur'an paham 'ulama

Wahéi manusia ingat beuteùga
Nabi han lé na ôhleuh lôn masa
Hana léi umat seuleupah gata
Rukôn Agama peutunai sampöerna

Wahei manusia 'iklam lei gata
Allah ta'ala syit Tuhan sidröe
Asai bak Adam mandum manusia
Adam dari tanoh asai neu cipta

Kén ban ka Arab ka léu fadhilah
Keu uréung 'ajam teuleubeh mulia
Syit ketaqwaan nyang jéut kéu pilah
Derajat bak Allah kéu uréung takwa

Wasiet pusaka beu jróeh neubagi
Bek na meutaki bak bagi harta
Allah neu laknak ureung brôk keji
Sajan ngen iblih dalam nuraka

Segala amai ngèn kejahatan
Singéh di akhirat néu hisab teuma
Risalah Tuhan ka lôn sempurnakan
Ya Allah saksikan " Faqad Ballaghtu "

Öhnoe meumada bacut khulasan
Bak minbar islam kalam lôn baca
Béujéut faedah béu meütamah iman
Taufiq bak Tuhan si umu masa


*Tulisan ini sudah dimuat pada Buletin el Asyi KMA edisi 120

No comments:

Item Reviewed: Hikayat Khutbah Wada Rating: 5 Reviewed By: Unknown