Friday, November 23, 2012

MoU Aceh Damee

Karya: Abdul Hamid M. Jamil
 
Salamualaikom warahmatullah
Saleum loen peuhah kalam loen mula
Geulantoe peudeung musoeh uloen cah
Nariet ngen babah prang loen mula
 
Man mandum pujoe geutanyoe seurah
Keu poe teuh allah yang maha esa
Yang brie nikmat atra neuh luah
Geunaseh allah hana bandeng sa
 
Seulaweut ngen saleum kaoem meutuah
Laju taseurah keu baginda
Yang prang kafee islam neuruah
Lahee di makkah bak pusat donya
 
Jinoe loen mula bacut peutuah
Kisah that meugah jinoe loen rika
Meuah abua menyena salah
Nariet nibak babah tajam leupahna
 
Awai loen mula haba loen surah
Aceh yang meugah meucuhu nama
Dilei iskandar raja that meugah
Keurajeun luah di thei le donya
 
Mamandum musoeh kuyu geupeugah
Hansoe teujeut langkah aceh ilanya
Seubab keu hukoem masanyan meugah
Kalamullah ngen hadist saidina
 
 
Uroe keu uroe umu meutamah
Iskandar neupinah u asai mula
Tinggailah aceh seudeh meuleumpah 
Raja that meugah meuninggai donya
 
Teuma oh lheuh nyan laju neupinah
Keurajeuen yang luah geugantoe raja
Meuploh dum raja neuwoe bak Allah
Troh bak saah tanyoe yang bina
 
Watee nyan preside R.I Meutuah
Soekarno hattah pilehan bansa
Teuma troh masa Tuhan peuleumah
Neuwoe bak Allah u asai mula
 
Beudoh Soeharto geu hayon langkah
Hawa meuleumpah jeut keu penguasa
Peugot  semboyan rata meunasah
Bimbang tak usah saya setia
 
Gabuk Soeharto di jakartah
Teuntra geu ruwah aceh ka hina
Geupeugot DOM cukop menjajah
Lam apoh apah rakyat di siksa
 
Meuploh ploh thon sabee di jajah
Rakyat tan salah keunong ilanya
Ramee watee nyan yatim ka tan yah
Janda meuruwah lam tiep tiep desa
 
Meugah that aceh bansa muliah
Pantang di jajah ta lawan sigra
Beudoh teuk perte lawan penjajah
Niet sileupah bek lee di hina
 
Nibak calitra pih na geu surah
Taliban meugah wateenyan nama
Dudoe meuganto nama geu ubah
GAM geu olah nama geurika
 
Teukeujoet Soeharto  yoe sileupah
Mandum penjajah di lakee gisa
Ramee cit tentra watee nyan keumah
Keuhendak Allah han ek soe sangka
 
Rata jeut uteun mandum di jak cah
GAM nyang meugah di neuk ilanya
Ramee cit rakan mi meutuah
Yang woe bak Allah keunong senjata
 
Talakee doa keudeh bak Allah
Yang ka teulah bek lee meu gisaa
Yang ka syahid doa tapapah
Seumoga Allah neubi syiruga
 
Gabuk dum rakyat meuheut sileupah
Uteun yang luah bek lee di tuba
Jinoe keuh masa demo di Jakarta
Soeharto dipeugah di yue tron sigra
 
Meu uroe uroe rakyat meutamah
Keunan geulangkah jak goek goek donya
Dudoe eh lheuh  nyan Tuhan yu minah
Buk Mega tan kupiyah Presiden kita
 
Di ibuk Mega pih saban surah
Ata Soeharto kubah di lanjot sigra
Ramee lom tentra teuma ditamah
Paleh sileupah dimat kuasa
 
Beudoh pereutee GAM laju segerah
Keudeh u libiah latih tentara
Kirem senjata jai sileupah
Jikeneuk pilah Aceh-Indonesia
 
Sengsara rakyat meutamah tamah
Hoe hoe yang leumah beudee bicara
Mita raseuki hek casino great britain sileupah
Lam tiep meunasah pengungsi teuka
 
Teuma buk Mega laen ka leumah
Qanun di ubah dari yang ka ka
Awai kon DOM peudeh sileupah
Dinoe darurat susah bak yang ka
 
Ka limoeng thon keurajeun di papah
Jinoe troh saah pemilukada
Pileh presiden adee sieleumpah
Jinoe roh rakyah yang culok haba
 
 Di ibuk Mega han taloe langkah
Meuheut sileumpah mat lom kuasa
Takdir Tuhan laen lom leumah
SBY geupeuhah jalan merdeka
 
Watee nyan rakyat ka puleh grah
Tentra di kubah Cuma di kuta
Laen nibak nyan di beuot langkah
Keudeh u jakartah di riwang sigra
 
Nibak 24 tanggai geu surah
Buleun meuseujarah desember nama
Thon 2004 meunurot sejarah
Aceh neulimpah bala raksasa
 
Di ek ie laot lambong sileupah
Manyang na sihah bak u geu tanda
Teukeujot ureung rata jeut desah
Kehendak Allah aceh sengsara
 
Ramee that ureung neuwo bak Allah
Kuasa Allah leumah u donya
Nyang han tom terjadi jinoe ka teuhah
Aeb sileupah yang pubut dosa
 
Peusingkat kata haba lon surah
Ramee di singgah dum awak luwa
Jak mee bantuan rata meunasah
Mandum di ruwah dibagi rata
 
 Watee nyan rakyat patoh sileupah
Keu hukom Allah mandum keureuja
Mandum larangan laju dikeubah
Mandum ka insaf troh bak meuruwa
 
Di Irlandia saboh sejarah
Meuheut sileupah dame beu teuka
Dipeuget cara mandum di olah
Maarti  artisarah yang peuphon haba
 
Di undang meuntro GAM wakilah
Hamid Awwaluddin peugah waki Indonesia
Puduek acara cukop meriah
Lam kaca indah dame geubuka
 
Peuget pengumuman rata meunasah
Rata jeut rumah meu suka ria
Hudep ka makmu musoh ka leupah
Raseuki mudah jalan tamita
 
Yang leupah saket rakan meutuah
Dame ka teuhah di syukur hana
Rata jeut rumah asap meulhap lhap
Ganja di karat bakong di puta
 
Bak taloe jalan tunu sileupah
Agam ngon darah ka di meu wa wa
Hana aturan hudeip tan arah
Watee tapeugah tanyoe di cerca
  
Menyo nyoe cara hana ta ubah
Tuhan neu balah mandum keu gata
Dilee ka bala saket sileupah
Tapreh preh teuhah neugulong donya
 
Hoe ka gata aneuk meutuah
Adat beu jeulah hukom tapeuna
Nek lee na maksiet rata jeut rumah
Tuhan peu leumah jalan u syuruga
 
Eit noe meumada rika sejarah
Yang lon peugah kon keu gura gura
Rata jeut buku meunan neusurah
Inti seujarah beu get tajaga
 
Meunyoe na kata masen bak babah
Meuah peutuah kon loen sengaja
Akhirul kalam haba ka tammah
Beuna manfaah bagi yang baca
 

Badan Takaful Aceh


No comments:

Item Reviewed: MoU Aceh Damee Rating: 5 Reviewed By: kmamesir