Tuesday, March 19, 2013

Tuntuet Ilmee



Assalamu"alaikoem kaoem meutuah
rahmat poe tallah sabe keu gata
rata jeut uteun glee neulangkah
gata le Allah sabee neu jaga

Mamanduem pujoe syukoe hai ayah
laju taseurah keu poe yang Esa
yang peujeut manusia rupa that ceudah
atra neuh luwah ban sigoem doenya

Seulaweut ngen saleum aduen meutuah
keu Rasul yang meugah tabaca beuna
Muhammad Nabi peunutoeb ambiyah
lahe di Mekkah bak pusat doenya

Deungeu hai Teungku aduen meutuah
bacuet peutuah jinoe uloen ba
meukusuet hate keunan loen langkah
tapi hai ayah watee loen hana

Lam lembaran nyoe  jinoe loen peugah
ilme hai ayah peunteng lagoina
jak tamita laju beubagah
segolom teulah umu ka tuha

Sideh di Nanggroe niet ka jeulah
awai di saah gata jak teuka
ilmee tamita janji bak ayah
loen woe ka gagah dreun han keucewa

Peugeut khanduri peusijuek gatah
imum meunasah geuundang sigra
hidang bulukat leukiet hai ayah
ilmee tapapah nyan blukat umpama

Neubloe ngen bajee manduem peukakah
aneuk jak langkah ilmee dimita
adak duem abeh peng hana masalah
nyan duem setia ayah keu gata

Lheuh beurangkat nanggroe takubah
bunda ngen ayah doa geuseudia
geuroe ie mata kadang tiep saah
aneuk beumudah ilmee dimita

Mita beulanja keu aneuk meutuah
lam tiep buleun di ayah geukirem sabe na
yang penteng ke aneuk bek na susah
diriwang beu bagah ilme dipula

beuna taingat jasa di ayah
lam tiep-tiep saah raseuki geumita
meunan syiet poma aduen meutuah
lam tiep-tiep saah doa geuseudia

Deumi keu aneuk seunang lam dayah
adak pieh soesah teutap geupena
adak tan keudroe geuh hana masalah
aneuk geupapah sampoe dewasa

Wahe eu bangsa loen yang saboh darah
beudeuh beusigrah ilmee tamita
tapula lada jinoe beubagah
singeuh bek teulah oeh watee tuha

Oleh: Abdul Hamid M Djamil*
*Anggota IPSA (Ikatan Penulis Santri Aceh)


No comments:

Item Reviewed: Tuntuet Ilmee Rating: 5 Reviewed By: kmamesir