Sunday, October 18, 2015

Rihlah Baroe Sa



Oleh: Sabrun Jamil*

Salam’alaikom warahmatullah
Saleum neubalah wahe syedara
Ingat nabi kheun saleum nyan sunnah
Teuma nyang balah wajeb hukomnya

Nyang keuphon that-that lon pujoe Allah
Syukor keu ni’mah nyang ka tarasa
Keu Tuhan sidroe ulon meuseurah
Moga hikayah manfaat beuna

Teuma keudua seulaweut lon sah
Keu Rasulullah pang ulee donya
Meunan sit ateuh al dan shahabah
Nyang lam sejarah teucatat mulya

Pakriban haba rakan meutuwah
Moga lam shihah hana meubala
Meunye na saket beu puleh bagah
Bek gadoh hih hah ie dong u luwa

Na bacut haba keuneuk lon peugah
Dengue beu jeulah ulon calitra
Bek le neumetmot neuduk beu gagah
Nyoe bacut kisah rihlah baroe sa

Tanggai dua limong buleun zulhijjah
KMA rihlah u matrouh siwa
Rihlah kali nyoe hayeu meulumpah
Babah roh teuhah hana tarasa

Nakeuh malam nyan ka poh dua blah
Keumah beubagah beukai wajeb na
Na yang taguen bu na yang meurah-rah
Cukop meuriah nyoe suasana

Untuk nyang ukeu lon lake meuah
Buhu lon rubah akhe lon tuka
Cukop leu kata hana tingat pah
Kiban tapeugah hudep lam kota

Poh dua malam moto laju troh
Ureung ka rioh teumpat duek mita
Nyang teueh-eh laju teubeudoh
Teungeut ka gadoh jiplung leh ho ka

Barang geubeuot laju di sinan
Persediaan lam bagasi ba
Laju ek moto sira tuleh nan
Bah ‘oh di jalan bek tinggai gata

Meunan ka siap moto dibrangkat
Hana dikarat meulek that diba
Ureung lam moto jaroe meuangkat
Teungoh khusu’ that meubaca do’a

Malam jula ureung ka teungeut
Ureung seumeungeup leh padum droe ka
Lam pu dipeulen gorden dijieut
Supaya han jeut ditamong cahya

Meunan teujaga ka suboh uroe
Laju sidroe-droe jak u mushala
Peudong jama’ah bek gadoh sidroe
Bek sampoe rugoe nit that pahala

Moto nyang piyoh jinoe dijak lom
Meusen meubrom brom lage su naga
Matauroe ek buleun dimeusom
Mulai peungeuh lom beungoh ka teuka



Prut ka mulai deuk tijoh ie babah
Jinoe ka suwah warong tamita
Meubek ta preh le hai super bagah
Eunteuk saket mah soe nyang tem rasa

Meunan poh lapan warong ka meupat
Laju meusapat meulingka meja
Na nyang peusan tee tapi agak klat
Bah pih hana that teutap meurasa

Menu beungoh nyan leupah that tari
Hebat that koki get that meurasa
Eungkot pih bereh teumon bu guri
Ngen sambai capli leumak leupahna

Moto dijak lom prut pih ka aman
Moto bak jalan sepi seulingka
Wie nun takalon nyang deuh sit saban
Na pemandangan guron meuhampa

Di dalam moto cukop brat sunyi
Meusu Bang Hendri baro na suara
Oh leuh nyan peudong stand up comedy
Buet bang Chadafi lucu that haba

Hana teurasa moto dipiyoh
Ka troh u Matroh rupajih kita
Leupah that ceudah walaupun na broh
Nan jih ureung boh Hammam Cleopatra

Laju meupoto padum-padum on
Nasit nyang meutron u mieng kuala
Kaleuh ta kalon kareung meususon
Kaleuh ta tamong Hammam Cleopatra

Beurati jinoe kajeut ta minah
Pante ‘Ajibah nyang selanjutnya
Pante sit lage nyang ureun peugah
Leupah that ceudah indah lagoina

Hana saba le manoe ju langsong
Ombak meugulong cukop menggoda
Biru meuijo meugabong-gabong
Soe nyang ek tanggong manoe that hawa

Sira meulangue sira ma’en bhan
Na tarek tambang bineh kuala
Wate seuleusoe hek that ka badan
Gaki pih ka kram pakiban cara

Laju me moto u penginapan
Nyang nyoe tujuan di kota siwa
Siwa Safari Paradise meu nan
Nakeuh hotel nyan lam kebon kurma

Dibagi kama mita ngen keudroe
Saboh keu lhee droe na sit nyang dua
Segala barang keunan tapasoe
Oh leuh nyan manoe ban segar mata

Hek ka gadoeh mita buet laen
Yak sewa tangen keu wet-wet siwa
Malam nyan laju tre-tre jak maen
Jak weng-weng tangen jak puta-puta

Malam ka jula baroe meuriwang
Jeum wate nyan leh karap poh sa
Lagak that lumpoe teungeut malam nyan
Maklum hai rakan brat that ka mata

Sijeum siteungoh segolom beungoh
Langsong teubeudoh langsong teujaga
Lumpoe ka tuwoe teungeut ka gadoh
Ngon pikiran soh jak wudhu’ sigra

Ban leuh sembahyang meuzikir siat
Langet di barat galom meucahya
Dang peungeuh uroe meuduek-duek siat
Pike ho tempat eunteuk meuputa

Teungoh meuduek-duek bu ka meuidang
Sambai jih rakan leupah meurasa
Nyan leumak mabok hana tebayang
Han teugambarkan mangat that rasa

Oh leuh pajoh bu uroe mulai trang
Laju meuriwang gisa u kama
Yak cok sitangen yak jalan-jalan
Meuili-alang bak jalan raya

Meuweng sitangen peukeu u baroh
Meuruoh-ruoh bak olahraga
Teukeupak-keupak kamoe wate troh
Kamoe meupiyoh bak jabal mauta

Meuruhung-ruhung ateuh jabal nyan
Jameun kuburan kheun ureung lingka
Seumiyup mayet dalam uruk nyan
Teuhah-hah meunan ditop pih hana

Meujingeuk-jingeuk dalam uruk nyan
Baro oh leuh nyan weng lom sepeda
Tujuan nyang nyoe meugampong meunan
Nyoe peninggalan sejarah lama

Tempat kamoe nyoe Qal’ah Shali nan
Kaom duek sinan Ber-Ber namanya
Hi rumoh sidom tengieng tempat nyan
Meugah tempat nyan yoh jameun masa

Ka trep di sinan riwang u rumoh
Badan ka leumoh meublek-blek mata
Ka hek weng tangen kajeut ta piyoh
Badan meuruoh ta manoe sigra

Troh u hotel buet macam bagoe
Na nyang jak manoe lam hammam kama
Na sit nyag langsong teungeut lam lumpoe
Na sit nyang manoe lam kulam raya

Laju oh leuh nyan tangen jak pulang
U keude beuklam tangen peugisa
Bek lewat wate laju peuriwang
Yue tamah uang teulat tagisa

Leupah that gura nyang teungeut munoe
Tangen geupeuwoe teulat leupahna
Ban jaga teungeut ka sibok keudroe
Get that meupaloe ka teulat jaga

Di wate luho troh laen moto
Off road nyan lagoe kaleuh tasewa
Neusimak beuget bek neujak saho
Ata oh leuh nyoe babak utama

Moto off road nyan hi moto Kijang
Diplung hai rakan teuga bak unta
Ji’ek dan di tron lam padang Tuhan
Diplung plah padang guron di puta

Digah kop teuga meunan di’ek cot
Lam moto teuh keu’ot nafah tamita
Wate ditron cot jantong meudhop-dhop
Meukhet-khet tuot meblek-blek mata

Na saboh moto get that meupaloe
Aleh moto soe meusen ka tuha
Oh wate ek cot tan ek dilampoe
Igoe digantoe surot jak puta

Lebeh bak sijeum meuwet-wet padang
Lam luah padang meuputa-puta
Laju oh leuh nyan puta haluan
Jinoe tujuan oasis Siwa

Leupah that hireun takalon ie nyan
Lam luah padang dari pane na
Han roh lam akai gura that rakan
Kuasa Tuhan luar biasa

Nireng oasis rapa’i dipeh
Leupah that bereh lagu pih kana
Oh wate abeh taheu ureung peh
Manoe han jadeh ka brangkat teuma

Oh leuh manoe bak oasis leupie
Jinoe mata ie nyang suum teuma
Oh wate dibor galom raseuki
Nyang ditubiet ie minyeuk dimita

Aleuh nyan rakan pinah tujuan
U laen padang nyang leu cot mita
Moto dipiyoh bak cot nyang manyang
Bah maken garang wate ski taba

Laju meuplung-plung yak maen ski
Lam padang pasi meutron-meugisa
Oh ek u wateuh cukop brat gaki
Oh tron ngen ski hana teurasa

Uroe ka supot malam ka ditron
Cok poto si on bersama-sama
Ureung meukumpoi laju meuron-ron
Banja geususon tuleh KMA

Leuh nyan meuriwang u hotel laju
Moto hu lampu lhoh jalan raya
Meunan troh hotel preh-preh masak bu
Leuh nyan eh laju teutiek lam kama

Na ladom ureung oh leuh pajoh bu
Geumeukuk-kuk su geujak poh cakra
Na sit nyang laen wareh lagak su
Geutarek lagu gitar pih kana

Oh singoh bengoh laju lam kulam
Meujak beurenang nireng bak kurma
Uroe teurakhe tamanfaatkan
Tachen-chen keunan bah gadoeh hawa

Meunan cot uroe laju meukeumah
Laju meucok tah kanceng meubuka
Sak mandum barang nyang tho nyang basah
Euteuk sigoe rah wate tagisa

Laju ek moto peukeu u tunong
Keuneuk meukalon mon Cleopatra
Galom troh keunan na gunong-gunong
Sejarah Amon yoh jameun masa

Leupah that gura Cleopatra nyan
Di Matrouh hammam mon na di Siwa
Leh kiban cara geujak saat nyan
Meusitangen tan peu lom Yamaha

Oh leuh di sinan puta tujuan
U laen jalan nireng kuala
Get that hayeu kuala nyan
Kuasa Tuhan ubah keu sira

Meucok-cok poto lam kawasan nyan
Lam bareh panyang meubanja-banja
Baroe oh leuh nyan meuputa lom bhan
Keudeh tujuan u kebon kurma

Kebon kurma nyan sagai tan ubeut
Bak kurma sujud di dalam pih na
Pajoh ku-kurma menye kadeuk prut
Mata ie ubeut di sinan pih na

Kebon kurma nyan akhe tujuan
Jinoe ta riwang u Cairo teuma
Badan ka lape kulet ka itam
Ka sep hai rakan taputa-puta

Leupah that bereh rihlah kali nyoe
Teume lam lumpoe luar biasa
Apresiasi keu mandum sagoe
Nyang phui-phui jaroe uroh semua

Dalam kawan nyan na Bang Irwandi
Abang Qusyairi seurta anggota
Na sit Bang Mujek dengon Bang Hendri
Na sit Bang Zuhri Bang Muhib pih na

Le sit oh leuh nyan ureung jak bantu
Meubahu-bahu peuphui keureuja
Hana mungken sit satu per satu
Lon sebutkan ju dalam cerita

Kakeuh sep meunan haba lon peugah
Ka kuweut babah kabeh ceurita
Le pat that salah lon lake meuah
Tulong maklumlah ban jeut meurika

*Penulis adalah mahasiswa tingkat 2 Universitas Al-Azhar, Kairo.
Badan Takaful Aceh


No comments:

Item Reviewed: Rihlah Baroe Sa Rating: 5 Reviewed By: kmamesir