Monday, April 20, 2020

Marhaban Buleun Ramadhan

Oleh: Haris Akbar Zahari*

Sumber foto: @everydaycairo

Assalamualaikum wa rahmatullah
Jaroe dua blah ateuh jeumala
Lon sapa bandum syedara metuah
Sigohlom lon surah ngen kata-kata

Bak phon-phon haba lon kheun bismillah
Bak poe teuh Allah rahmat ta mita
Nyang peujet alam leupah that meugah
Han soe jeut cacah bumoe rabbana

Seulaweut saleum ke Rasulullah
Nabi amanah that brat mulia
Panglima prang yang peuphoen hijrah
Lam lindong Allah pemilek donya

Yoeh golom jioh haba bak lidah
Lon peupah siblah gaya bahasa
Menyoe na salah lon lake meuah
Meukilah babah mungken le dausa

Wahee rakan hai yang sok kupiah
Siap beu gagah lon peutroh haba
Di cutkak lagak ban jambe mirah
Hikayat ka pah untuk syedara

Puja keu Allah tuhan yang Rahman
Bak tula jalan tanyoe meudoa
Moga di lusa betroeh bek lamban
Sambot Ramadhan lam sihat teuma

Ahlan wa marhaban buleun Ramadhan
Meunan tanggapan kamoe bahgia
Bak masa jinoe kaloen hai taulan
Raja neulayan mandum terpana

Baroesa sang-sang puasa sajan
singeh hai rakan mandum bersama
Allah peu kabol mandum harapan
Deungon ramadhan akan berjumpa

Beureukah neubri lam rajab Sya’ban
Peu troeh ramadhan ke kamoe hamba
Syukoe ngoen pujoe Allah ya Rahman
Bak tip-tip bulan rahmat seutara

Lon peutroh sigra bacut kalimah
Tentang fazilah cukop meulimpah
Buleun Ramadhan buleun yang ceudah
Adak ta theun grah pahala meutamah

Buleun puasa leupah that mewah
langet ka teuhah syiruga leumah
Jen ngon iblih pih ka meuramah
Hana le juah geukurong le Allah

Kadang na taduk nibak meunasah
Deungoe ceuramah sabe geupeugah
Bak buleun nyoe hai peristiwa ruah
termasuk nyang pah peutroen Qur’an hidayah

Lailatul Qadar bagai anugrah
Sinoe sit leumah leupah brat kesan
Simalam berkah dum that meulimpah
lage barakah siribe bulan

Wahe rakan lon ban sigom donya
Iseulam saudara nyang berbahagia
Dua uroe teuk kapai ka tiba
Ramadhan nama tanyoe boh saja

Meunan hai cutbang ibarat kana
Na tom lon tanda di balee sikula
Bacut hai cutkak lon samboeng haba
Tentang nyang utama bak lhe ploh puasa 

@everydaycairo


Bahtera Ramadhan troh di dermaga
Sebulan kita akan bersua
Buet ibadah moga terlaksana
Bek sampo lusa hate kecewa

Siphloh bak awai rahmat terbuka
Keu manusia yang tem puasa
Leupah that sayang Allah keu gata
Wahee e hamba nyang mabok donya

Geubuka syiruga ke bandum hamba
Geutop nuraka ke tanyoe sigra
Teunte nyang meu iman di dalam dada
Rela puasa perintah Rabbana

Lam masa meunoe wahe saudara
Hudep nyang papa turut ta rasa
Gaseh-meugaseh hudep lam donya
Takhem sama-sama ta moe pih dua

Siphloh di teungoh juga istimewa
Taturi nama masa maghfirah
Allah peu ampon dum ban jai dausa
Keu manusia nyang theun deuk ngoen grah

Tanyo ka sadar sabe meluka
Bak hate poma hantom meutuah
Beu oet ju jaroe pada Rabbana
Peu ampon hamba sangat bersalah

Siploh di akhe juga cukop trang
leupah that garang buleun puasa
lam seungu malam Nabi sembahyang
langet meubintang jeut saksi mata

Bak siphloh akhe han tom ta bayang
Apui pemanggang geupeloen sigra
“Itqun minan nar” meunan kheun lantang
Han ek ta bayang suum nuraka

Hana meukarat hana pih rijang
Lailatul Qadar trang sinoe teubuka
Bak ganjil awai malam nyan kembang
Barakat garang keu umat dumna

Allah ya Allah seunang that kamoe
Meukaloen leumoe singeh ka rubah
Tapet sige sapat makmeugang ka toe
Rendang meu asoe iphee ie babah

Poma ngoen ayah seunang that satnyoe
Meunan sit adoe teukhem kaleupah
Tapi khabaran luka uroe nyoe
Abang hanjeut woe karena na wabah

Rindu keu gampong sideh di sagoe
Karap roeh ta moe ingat keumamah
Tapi hai poma bah abang sinoe
Jioh di bumoe hana masalah

Aneuk mit jinoe pih han tem theun taloe
Singeh ka sahooe ban jaga susah
Ladom geutanyoe leupah that pungoe
Teungeut lam uroe, malam ban lincah

Leupah that deuk wate cot uroe
Hai sabe meunoe phon-phon puasa
Wate ka meugreb meusapat tanyoe
Di rumoh droe atau di lua

Lam senja supot teubayang jinoe
Di Kairo kamoe ka teuleung tika
Untuk berbuka bak dermawan Sinoe
“Maidah rahman” nyang toe menu sempurna

Alah hai poe untuk saat nyoe
Meudoa tanyoe bak Allah Rabbana
Beujioh bala beubagah meuwoe
Bansigom bumoe beu glah corona

Bek na nyang leumoeh sibarang kasoe
Dermawan han beu-o berbagi harta
Dumpat jeut tadoeng hana soe hiroe
Rezeki dari poe pasti na saja

Bacut lon ceukot kisah hai aduen
Peunajoeh dusun bak wate buka
Kamoe di Mesir lam nanggroe Fir’un
Sabe meujakeun ata ureung kaya

Beda di Aceh nanggroe han gusuen
Sideh di Bireuen timon waih beuna
Macam bagoe dum bek that neu hireun
Beda di Bernuen beda di Banda

Di Pidie Jaya leumang hanjeut han
Sambai teurasi nan dithee di Langsa
Nicah oen kayee menyoe di Nagan
Di siglie rakan mie caluk beuna

Ija kroeng wajeb na dalam Ramadhan
Hai bek sikhan-khan teuraweh beuna
Menyoe di Mesir jubah bek kaphan
Teuraweh keunan di Al-Azhar tercinta

Na nyang rubah bak rak’at lapan
Pruet terbeban dum that berbuka
Na sit teukaloen teugeut si kawan
Meunan keulakuan karena indah irama

Bak teungoh malam tadarus gagah
Al-Quran ta gah sigra ta baca
Dengoen bismillah juz sa beu leupah
Singeh ta peupah hafalan dumna

Krue seumangat si agam ayah
Hana le payah tayue membaca
Meunan sit dara lam murajaah
Aneuk amanah tamoeng syiruga

Lon kira ‘oeh noe syae lon piyoh
Leupah that riyoh siuroe supot
Meuah lon lakee meusaboh lampoh
Ban sigom tuboh kamoe jak surot

Bek tuwe hai bang doa bek putoh
Beu sehat tuboh tanyoe bahgia
Buleun puasa leupah that tedoh
Beurijang keuh troeh bek le meutunda

Salam alaikom lon pamit meunan
Berkah ramadhan corona sirna
Selamat puasa mandum hai rakan
pahala ramadhan buleun mulia



*Penulis adalah mahasiswa tingkat 1 Fakultas Ushuluddin Universitas Al-Azhar.

No comments:

Item Reviewed: Marhaban Buleun Ramadhan Rating: 5 Reviewed By: kmamesir