Rihlah LUXOR - HURGADA Part I

(Bagian Phoen)

Nyan….punyan……
Soe nyan…..
Pubuet keunan………..
Bek peugot preman, sinan….
Deungo dile su lon tuan
Nyo kon seudati…..nyoe kon saman
Tapi cae…hikayat meunan-meunan
Dari peungarang yang hana geuboeh nan

Bismillah Alhamdulillah
Jino lon peugah saboh calitra
Yang mantong karu seungab beubagah
Bek lon cob babah ngon beuneung nila

Tanyoe mukumpoi bak jeum poh siblah
Jak bagah-bagah u KMA
Sideh ka geupreh le ureung yang gagah
Tgk Salman mutuwah nyang keuh ketua

Soe yang troh keunan babah ka teuhah
Geu kalon tah meususon banja
Geu pike laju peu na musibah
Atawa evakuasikah kali keudua

Tapi di dalam na yang teungoh boh kuah
Na yang peugot bu kulah beukai keuneuk ba
Na yang ladom boh lam keureutah
Lam kis zibalah nyang be-be raya

Jeum jiteunyoh bak poh duablah
Hai bagah-bagah moto ka teuka
Tanyo jak buet beulage tapeugah
Supaya han salah deungon agama

Meunyoe ka takheun jak poh siblah
Bek sampe leupah keudeh poh dua
Nyan hai rakan buet hana susah
Asai tanyoe pah lage rencana

Dicong bak trieng na rumoh lutong
Dimiyeub reubong jiduek muruwa
Jinoe rawie hoe laen ta sambong
Ka troh bak linggong dalam calitra

Neuduek keuh beugot bek singet punggong
Ngak lon sambong bagian keudua
Ta-eu peserta jigrop-grop lambong
Ngon-ngon meusinggong hana ji kira

Rihlah kali nyoe hana tanggong-tanggong
Ide meulambong dari KMA
Teumpat geupileh kon u Gronggrong
Tapi langsong u Luxor – Hurgada

Ureung yang ikot dari lhee jurong
Teungku ija krong dan kaum hawa
Tapi nasyit yang suwah ranggong
Heut neuk gabong beulanja hana

Rame yang iiko nibak kali nyoe
94 droe ngon ureung luwa
Dua boh moto ka punoh asoe
Sinan musahoe agam ngon dara

Di ureung agam lam saboh moto
Di ureung binoe jampu keluarga
Yang duek dikeu Ustaz Toto
Yang me moto Thariq nama

Ustaz Muslih yang mat komando
Awak tanyo keu panitia
Teungku Azwani memang that jago
Tanyo geuato seulaku ketua

Teungku Syairazi yang peugot lucu
Geuduek pih dikeu bineh jeuneula
Bak baca doa ka abeh lagu
Geu bahue laju Iza Raja’a

Teuma yang laen nan Fakhrurrazi
Nyan keuh hai akhi yang ba acara
Macam hadiah geubagi-bagi
Dari madoli dan cendra mata

Teungku Zulfan bidang konsumsi
Anggota geulayani ka lage raja
Geu atoe bu malam ngon pagi
Sampe sound n lighty hana geurasa

Na yang laen panitia inti
Hana lon turi bidang keurija
Lagee Teungku Muhajirul Fadli
Ula-ili that muputa-puta

Na syit lom yang nan Uncle Suci
Gob nyan urusi bidang beulanja
Tiep uroe sibok ngon kali bagi
Peng beumeukri bek na cok laba

Teungku Salman cukop ganteng hi
Nyan ka pasti sabab ketua
Deuh wibawa saboh organisasi
Kon maksud hati tebar pesona

Macam sedia keu beukai diri
Na yang mei Pom Mie na yang halua
Na yang ladom punoh ngon Syipsi
Geutamah ruti dan pisang tuha

Na yang ba kacang kon toji
Saket gusi-gusi kreuh lagoina
Troh lam moto nyan geubagi-bagi
Memang deuh hi saboh keluarga

Leubeh lom leungkap rihlah kali ini
Na dari ukhty yang mukat pulsa
Di dalam moto pengumuman geubri
Kawan bek sangsi pulsa bak lon na

Nyang keuh meunan keluarga seujati
Saleng ta meubri sama syedara
Keu persiapan ka abeh tatukri
Deuh sinan hi na kerja sama

Nyoe baro mukaddimah rawi
Goh lom bak inti saboh calitra
Euntuk meusambong bak fashlus sani
Jitamong rawi bak Luxor-Hurgada

. . .

Meusambong bak bagian keu-2