Wahee e kawan wahe e rakan
Hikayat lon tuan meusambong lagi
Bagian yang phon nakeuh permulaan
Calitra sambongan jinoe ta mulai
Mula dari Kairo muputa bhan
Lam teungoh malam seutang meunari
Le yang ta lewat bak bineh jalan
Sampoe tujuan pah teungoh hari
Na piyoh siat di kota singgahan
Tapi di sinan kon neuk jep kupi
Meukarat moto BBM tan
Nyo pakri ban troh Luxor citi
Alhamdulillah na bantuan
Bak kanto cabang awak travel jibri
Ji pasoe laju ban dua moto nyan
Sampe hai rakan ka punoh tangki
Tour berlanjut menuju tujuan
Kota kenangan jejak Fir’uni
Jeum poh dua kamo troh keunan
Bandum rombongan deuk han sakri
Kiban tapeugot syit ka meunan
Na halangan di jalan Tuhan bri
Ban wate troh nibak penginapan
Langsong hai taulan bu ji bagi
Menu pih mantap olah Bang Zulfan
Manok panggang ka lage Kentucky
Na nyang ladom murumpok badan
Na syit kawan murumpok gaki
Siat bak hotel untuk istirahatan
Dan sembahyang ato sikat gigi
Wate geutubiet ka laen penampilan
Deungon pakaian yang ka baro hi
Bak poh lhee uroe rombongan tubiet
Ngon aneuk miet sajan seuruta
Hana geuthee droe uroe geuthat griet
Seu-um meu hip-hip nanggroe sahara
Rombongan tubiet meuranjo-rajoe
Keudeh lam moto geu ek sigra
Saweub suhu seu-um that uroe
Hana meusigroe tinggai di lua
Bak Ma’bad Karnak tujuan sampoe
Tiket ka geubloe lee panitia
Tiket bandum geujok bak jaroe
Sion-on sapoe ka sama rata
Jak tamong laju lam jeup-jeup sagoe
Bek sagai tuwoe neu cok gamba
Neudong beusare dilee phone sigoe
Kaneuk poto kamera panitia
Nek Fir’un pih ka teudong lam uroe
Nyan bek tuwoe neukodak sigra
Na syit patong nyang tuduek sidroe
Dan di lua adoe na gamba singa
Memang hayeu bangunan masa lampoe
Sampe jinoe mantong ta rasa
Meureutoh tameh teudong-dong keudroe
Tan pakek bajoe dan hana bara
Lupah gura dum awak tanyoe
Guide ka jibloe hana cok jasa
Kalheuh ji sewa hana soe pakoe
Galak jak keudroe berfoto ria
Na yang foto ngon singa hana igoe
Na bak jaroe kamera han meuhoe ka
Bak yue foto siat-at sapoe
Sampe ka tuwoe kamera bak soe ka
Jeum bak poh nam ka supot uroe
Rombogan geuwoe bak hotel gisa
Meunyoe rakan na yang katuwoe
Atlas Hotel adoe nyan tempat gata
Oh wate malam cukop that pangeeh
Lagee Da Maneh yang jitaleuk sa
Na yang ladom ka beungeeh-beungeeh
Sound and light abeh hana meurasa
Karab teulah Teungku Mujeck mameh
Dari uroe Hameh ka lam agenda
Beumeutumeung kalon atra yang aneh
Walaupun bak bineh lon beutrok teuka
Tapi ternyata nyan kon lage mutuleh
Cuco Fir’un paleh le tipu daya
Teulah digop nyan ka hana jadeh
Teukhem teuseuheh hana keucewa
Seuwueb rhoh dalam tim magueun
Ka laju geukheun di sinoe saja
Adak pih hawa teutap geu peutheun
Geu bantu adeun yang panitia
Sound and light saboh peukateun
Jeujak Fireu’un ji peu udep teuma
Jipeuhu lampu tamah ngon jikheun
Ureung jeut hireun nyan pat teuka
Oh beungoh laju ban Suboh beukah
Ka bagah-bagah siap sedia
Ubee na baje bungkoh dalam tah
Keuneuk meulangkah u laen lom kota
Hidangan phon ngon teh saboh glah
Pinu teuplah tamah halua
Nyan ie beungoh supaya bagah
Tanyoe meulangkah uroe keudua
Kota Luxor yang cukop meugah
Seu-um meulumpah uroe teurasa
Tapi di sinan le that seujarah
Fir’un la’natillah yang mat kuasa
Jinoe geusambong agenda rihlah
Geujak ziarah kuil wanita
Ma’bad Hatshepsut tujuan langkah
Le ureung peugah wanita punya
Nyan keuh ratu yang that meugah
Nyang mat peurintah keu gantoe raja
Fir’un keu limong saboh peuneugah
Dinasti lapan blah di Mesir lama
Oh ban troh keunan ek kereta panyang
Lagee hi hai rakan kereta api
Sambong meusambong meukarang-karang
Peu ek peunumpang bek jalan kaki
Teuman aneuk miet lupah that sayang
Meurawong-riang lam ningkue ummi
Sabab seu-um hana teubayang
Kureung siapan tan pake teupi
Dua jeum sinan watee neuk riwang
Bandum rombongan ka geubloe teupi
Hana ek geutheun lam uroe trang
Suwah na bayang baro na leupi
Jino karab troh wate seumbahyang
Bek tuwo jum’atan wahai e akhi
Ta ek moto laju beurijang
Tanyoe seumbahyang bak masjid Abul Hajjaji
Wajeb getanyoe gob nyan ta keunang
Yang ba Iseulam ajaran nabi
Yang hantem pateh bandum ka geuprang
Yang meunenek moyang deungon Yahudi
Lheuh nyan teungku tanyo meuriwang
Tajak meuseunang di Hurgada citi
Watee euntuk ta makan siang
Bek tuwo peusan teh ngon kupi
Le that bak jalan jipake palang
Lage di Aceh sang wate na pa-i
Meumada dilee haba lon peutrang
Hikayat lon karang laen keula-i
Oleh: Tgk. As'adi
.gif)
Posting Komentar