Madrasah Hadih Ureung Acèh


Oleh: Muhammad Gia Nabila*

(Dokumen Pribadi)


Alhamdulillah pujoe keu Rabbi 

Tuhan nyang geubri sihat seujahtra 

Seulaweuët saleuëm keu sidroë Nabi 

Mandum taturi Muhammad dia 


Rasul Musthafa janjôngan Nabi 

Geupeutrang hati alam semesta 

Sahbat keuluarga pih ulôn puji 

Nyang ka peuturi haba baginda 


Qur'an ngön hadih peutunyok titi 

Untuk taturi Allah nyang Esa 

Jak tanyöe rakan baréh beurapi 

Ngön nibak syar'i neumat beutiga 


èleumèe hadih akhi ngön ukhti 

Leupah meu areuti nibak agama 

Bahaih kheun ngön buët juga hai Nabi 

Nyang ka geu rawi oleh ulama 


Imeum Malik ngön Imeum Syafi'i 

Juga Hanbali mandum seureuta 

Ulama hayeuë nyang ka neuturi 

Juga Bukhari hadéh geumita 


Sidroë ulama mazhab Syaf'i 

Teuntèe taturi meusyeuhu nama 

Ibeunu Hajar Al-Asqalani 

Nukhbatul Fikari kitab geupeuna 


Kitab nyang ubit mudah ta haphai 

Beujeuët keu amai ilmee ta mita 

Ureuëng meu ilmee ka Tuhan janji 

Deurajat tinggi akhérat dônya 


Ibeunu Hajar syarah geu uki 

Nuzhatun nazhari nyan geubôh nama 

Syarah geutuleh ngön seunang hati 

Nyan pinta dari murid setia 


Syarah meu asoë padat ngön rapi 

Meurumpok puji mandum Ulama 

Kitab nyang peunténg dipeulajari 

Seubagoë gunci meuphôm pemula 


Nibak uroë nyoë Allah ka neubri 

Kamoe raseuki kitab ta baca 

Kitab nyoë khatam limöng plôh hari 

Tujôh blah kali kamoë berjumpa 


Teurimöng geunaséh Teungku Auza'i 

Ka baik hati teumpat geuseudia 

Dan Teungku Hafizh, Arif ngön Fikri 

Pih Fakhrurrazi meureunoë bersama 


Teungku Abdul Rahman geuba konsumsi 

Teungku Thariq pi jeumot bertanya 

Jamè geutanyoë Teungku Fizal Azmi 

Ulôn seundiri Muhammad Gia. 


Juga han tuwoë pertama kali 

Keu gurèe kami Bang Aditya 

Kamoe geupeurunoe ngön ikhlas hati 

Baik that budi deungön berjasa 


Dari Mathariyah geu beu ôt gaki 

Untuk geubagi ilmee nyang kana 

Bôh jak hai rakan bak Community 

Ilmee seujati tanyöe tamita 


Madrasah Hadih khusuih Al-Asyi 

Fikrah asasi meurunoë bersama 

Èleumèe hadih dari mubtadi 

Sampoë muntahi target kamoë na 


Madrasah Hadih nyö kamoë mulai 

Uroë keu Peut Ni bak buleuën Sapha 

Kitab nyang keuphôn Nuzhatun Nazhari 

Kamoe peulajari bak lapan Sapha 


Pujoe keu Allah seubagoë Rabbi 

Ngön pih keu Nabi seulaweuët beuna 

Uroë keu phôn bak adoë mulot geubri 

Nuzhatun Nazhari khatam tabaca 


Meunyoe uroë jumuat Allah teukeudi 

Kamoe kunjungi makam mulia 

Bak makam Imum Al-Asqalani 

Matan tahaphai beu abéh dumna 


Sampoë disinoë haba ulôn bri 

Lôn sambông keulayi 'oh khatam keudua 

Lôn lakè meu'ah nyö teupèh hati 

Lôn pamit diri bak kawôm dumna 


Wassalam 

ــــــــــــــــــــــــــــــــــــــــــــــــــــــــــــــــــــــــــــ 

Khadrawi, Darbul Ahmar, Cairo 

01 Rabi'ul Akhir 1442H 

17 November 2020M

*Penulis adalah mahasiswa tingkat tiga Fakultas Ushuluddin jurusan hadist, Universitas Al Azhar.

Posting Komentar

Keluarga Mahasiswa Aceh (KMA) Mesir
To Top