Bangsa Teuleubeh Ka Geutinggai Tanyoe
Oleh: Khairul Amar*
Ngon Izin Allah kisah lon sambot
Beutroh ban hajat lon suson haba
Bahan renungan sekalian sahbat
Beujeut peuingat ubat peunawa
Yoh phon that keudroe gantoe nasehat
Bek roh but jahat syethan peudaya
Ngon na tabacahaba tasurat
Niet-niet yang jahat hana roh keurija
Deungo syedara haba lon surat
Kadang cit meuhat jeut neupeuguna
Peu lom nyoe haba jaga syari'at
Asoe jih sarat dakwah Agama.
Bukon that sayang si bintang takat
Cahya tan meupat ta eu u donya
Leupah that sayang bidang syari'at
Timu ngon barat sang-sang rap mala
Donya ka akhe jahee leupah that
Ureung di karat nibak buet donya
Meunyoe agama cuma nan meu lhat
Meukong han le thet bak manusia
Judi ngon zina cit na tip saat
Ureung ka batat tuha ngon muda
Teror poh meupoh reuloh syari'at
Moral Dum umat lhe that ka cupa
Dalam berita dum haba jahat
Kriminal jeut pat ureung keurija
Awam ngon carong bandum buet batat
Iman rusak that reulhoh etika
Tanyoe di Aceh pih leubeh batat
Hukom syari'at lhe that meulangga
Nyan dum kabale teuka leupah brat
Hana teuingat malah di saja
Seruan agama menggema jeut pat
Ureung peuingat kat but nyang keuna
Dum dakwah Teungku Abi ngon
Ustadz Ulama peuingat peduli hana
Nyang ladom inong bingong ta ingat
Buet yang laknat geutem keurija
Gugur kandongan buet syethan laknat
Hana teuingat keupada dosya
Nyang ladom sayang jak dagang peungat
Ata terhormat geujak peusiwa
Dumna keuh bakhe jahee leupah brat
Hatee keubatat iman ka cupa
Hub bakhe lahee ie teumpat
Tabaa meuhat lam surat khaba
Bayi dijak boh kagadoh ingat
Ayah tan meupat ka deungon poma
Allahu Rabbi neubri seulamat
Umat Muhammad di dalam donya
Ubee na hamba nyang ka sisat
Beujitem taubat peu jioh desya
Ladom Peh batee male hana that
Gob kalon luwat gop nyan biasa
Dalam gang keude ek lhee geuingat
Soe nyang peuingat ji deungo hana
But ureung agam meunan ka lhe that
Nyang cukop hebat cit taroh bola
An troh u gampong soe dukong that brat
Sang gadoh ingat tuha ngon muda
Lhe that dum Laen seu maken ka brat
Meulanggar syari'at di Aceh raya
Meunyoe ta tuleh han abeh surat
Karap tiep saat ureung keurija
Tajak Meulaboh jioh leupah that
Meunyoe ta lewat laot malaka
Keu ureung buno jinoe lon
Pih le ka sisat geu ikot masa
*Penulis merupakan Juara Ketiga Lomba Cipta Syair / Hikayat Aceh HUT Setengah Abad KMA Mesir.
Posting Komentar