Haba HUT Keluarga Mahasiswa Atjèh Njang Keu-50 Thôn
Oleh: Taufiqurrahman Samsul Qamal*
 |
| Dok. Pribadi |
Assalamua’laikom saleuëm bak kamoe.
Tanda geutanyoe tameusyedara.
Saleum hormat keu rakan nanggroë
Nyang ka trôh keunoë ramè dum teuka
Subhanallah wabihamdihi
Pujoe keu rabbi Tuhan yang esa.
Tuhanku sidroë Allahu rabbi
Yang Maha Suci tupeu seugala.
Seulaweuët saleuëm keupada nabi
Sereuta ahli dan keuluarga
Nabi Muhammad geunaséh rabbi
Njang rupa that tari ceudah akhlaknya.
Krue seumangat rahmat meulimpah
Dari poe tallah keunoë u dônya
Sehat tubôh lôn neubi lè Allah
Lôn keuneuk peugah saboh calitra.
Deungön izin poe Alhamdulillah
Caé lôn kisah teuntang HUT KMA
HUT 50 thoen jinoë lôn kisah
Neudingoe beupah lôn marit haba
Bak thôn Tujôh peut teudong
Meuligoë Sinoë di nanggroe siribèe meunara
Talakei doa bak sidroë Poe
Nyoë Meuligoë sabé beu jaya.
Anggota phön na siplôh droë
Lapan hay adoë njang mahasiswa
Dua droë teuk lon hareutoe
Chit meusampoë binoë bandua.
Tgk. Ilyas daod pemimpin phôn
Wahe ee akhon umdah gelarnya
Meuwibawa, tegas dan santon
Ureung njang meuphôm bideuëng agama.
Dudoe keudua teuma ouh leuhnyan
Prof Azman jeuët keutua
Sidroë hafidz fasèh bacaan
Buët digopnyan imuem Meuseujid Raya
Teuma oh lheuëh nyan meugantoë-gantoë
Njang mat keumeudo meutuka-tuka
Ka meunan atôran nibak meuligoë
Dum sinaroe njang mat keutua
Tgk. Muhammad Sidqi teuma yang dudoë
Njang mat keumudoe hingga ohnoe ka
Ureung ceureudek göt geupakoë
Keu aneuk nanggroë njang na di KMA
Ouh jinoë thôn njang kameugantoë
Lapan reutoh droë anggota KMA
Njang asai rata tiëp-tiëp sagoë
Dari asoë bumoë Atjèh mulia
Dalam meuligoë cukop lei bideueng
Dum takalön ureung khidmah luar biasa
Seni dan bakat han ek ta bileuëng
Mandum na ruweuëng sinoë di KMA
Minye njang galak keu meunari
Rapai, seudati, saman pih na
Minye njang galak keu potografi
Jak bah ahli itpro dan TV KMA
Bagi kaom yang galak teumuleh
Jeut neupileh tamöng media
Njang galak hafai Qur’an wahe e wareh
Na disidéh halaqah Qur’an KMA
Jak sama-sama aduën ngen adoë
Bangun marwah droë bangsa mulia
Jaga peukateuen bèk barangkahoe
Singeh rugoë droë watèë akhé masa
Adat budaya keuneubah indatu
Wahe ee teungku beuget tajaga
Qanun dan reusam jaga seulalu
Lagè ka neuyuë dalam hadih maja
Nibak hukôm beuget tamumat
Peukara taat wajéb sampôrna
Beuget tahiroe mandum but sunat
Supaya seulamat akhirat dônya
Akhé calitra lôn neuk peusampoë
Meuah hay rakan droë meunyö na salah kata
Kadang na silap bak lôn hareutoe
Maklum hay sinaroe lon manteng pemula.
Teurimöng geunaséh panitia lôn hareutoe
Malam ngön uroë ka neukeurija
Talakei doa bak sidroë poe
Mandum ureueng droë tamöng syuruga
Ouh nyöe mantöng wahe ee taulan
Watèe Laén jan ta sambông teuma
Wallahu a’lam haba sudahan
Akhirulkalam dan sampai jumpa
*Penulis merupakan Juara Kedua Lomba Cipta Syair / Hikayat Aceh HUT Setengah Abad KMA Mesir.
Posting Komentar